சுந்தர்

வாடகை சைக்கிள்

2009-09-13T20:51:00.000-07:00

பள்ளம், மேடு

காடு ,கழனி,

நீர் வற்றிய

ஆற்று மணல்வெளி ,

எல்லாவற்றையும்

நான் கடந்து செல்ல

உதவியது நீ !

நான் உயரங்களை

அடைய உதவிய

நீ, என் துயர

நேரங்களிலும்

உடனிருந்திருக்கிறாய் !

உன்னுடனே வெகு தூரம்

பயணித்தாலும்

நீ என்னுடையதில்லை ;

என் பயணம்

முடிந்த பின்

உன்னை

ஒப்படைத்து

செல்ல வேண்டும்

குடைக் கவிதை

2009-09-09T23:21:00.000-07:00

கண்ணை பறிக்கும்

வண்ணங்கள் அதில்,

கையில் அடக்கி விடும்

வசதி அதில்,

, ஒரு நுனியில் இருட்டில்

ஒளி தரும் கைவிளக்கும்

உண்டு

, வெளி நாட்டு தயாரிப்பில்

வாங்கிய அந்த குடை

வண்ண மயமாய்,

வசதியாய்,

ஒளி விளக்காய்

, இருந்த போதிலும்,

மழையின் போது

குடையாய் மட்டும்

உபயோகிக்க

முடியவில்லை.

புலி பசித்தாலும்

புல்லை தின்னாது !

எலி பசித்தால்

குடையை தின்னுமா ?

கடவுள் உண்டா, இல்லையா?

2009-09-04T03:17:00.000-07:00

உலகத்திற்குக் கர்த்தாவாகிய கடவுள் ஒருவர் உண்டா, இல்லையா என்னும் இக்கேள்விக்கு ஆத்திகர் பலர் உண்டு என்கிறார்கள். நாத்திகர் இல்லை யென்கிறார்கள். ஆத்திகரும் நாத்திகருமல்லாத சந்தேகவாதிகள் உண்டு என்பாரை நோக்கி "கடவுள் இருந்தால் காட்டுங்கள்" என்கிறார்கள். ஆத்திகர் பலர் மற்ற இருதிறத்தார்க்கும் கடவுளைக் காட்டவேண்டி மிகவும் பிரயாசைப்படுகிறார்கள். ஆனால், ஆத்திகர்களுள் சைவர்களாகிய நாம் அக்கேள்விக்கு உண்டு என்றேயாவது இல்லையென்றேயாவது சொல்வதில்லை. பின் என் செய்வோமென்றால் மெளனமாயிருந்து விடுவோம். அல்லது, "உண்டு என்பவர்களுக்கு உண்டு, இல்லை யென்பவர்களுக்கு இல்லை" என்று சொல்வோம். நாம் மெளனமாயிருப்பதே அவர்கள் கேட்கும் கேள்விக்கு முதலில் அளிக்கும் விடையாகும். அவ்விடையின் கருத்தையறியாமலே அவர்கள் தாம் கேட்ட கேள்விக்குப் பதில் சொல்லமாட்டாமல் சும்மாவிருப்பதாக எண்ணிக்கொள்ளக்கூடும். நாம் "கடவுள் உண்டு என்பவர்க்கு உண்டு, இல்லை யென்பவர்க்கு இல்லை" என்று சொன்னால், அவர்கள் கைகொட்டி நகைத்து, "இது கோமுட்டி சாஷி சொன்னதுபோலாம். ஏக காலத்தில் உள்ளதாகவும் இல்லாததாகவும் இருக்கும் ஒருபொருளை நாம் எங்கும் கண்டதில்லை. அவ்வாறான பொருள் ஒன்றிருக்கும் என்பது மலடி மக்களைப் பெற்றாள், குருடன் கண்ணாரக்கண்டான், செவிடன் காதாரக்கேட்டான், முயலின் கொம்பு மூன்று முழ நீள மிருக்கும், என்பன போல் பொருளில்லாதனவாகிய வெறுஞ் சொற்களாம்" என்பார்கள். ஆதலால் நாம் அவர்களுக்களிக்கும் விடைகள் இரண்டனுள் முன்னே முதலில் அளிக்கும் மெளன விடையின் கருத்தை விளக்குவோம்.

நாம் எதையும் மனம் வாக்குக் காயங்களாகிய திரிகரணங்களைக் கொண்டு அறிகிறோம். திரிகரணங்கள் சடப்பொருள்கள். சடப்பொருள்களைக் கொண்டு சடப்பொருள்களை யறியக்கூடுமேயன்றி சித்துப்பொருளாகிய கடவுளை யறிய முடியாது. திரிகரணங்களால் கடவுளை அறியக்கூடுமாயின் கடவுள் என்பது சடப்பொருள்களுள் ஒன்றாய்விடும். அன்றியும், கடவுள் என்னுஞ் சொல்லுக்குக் "கடந்துநிற்றலையுடையது" என்பது பொருள். எதைக் கடந்து நிற்றலையுடையதெனில் தத்துவங்களைக் கடந்து நிற்றலையுடைய தென்போம். எனவே, தத்துவாதீதமாயிருக்கும் பொருள் எதுவோ அது கடவுள் என்பது பெறப்பட்டது. மனம், வாக்கு, காயம் என்னும் மூன்றும் திரிகரணங்கள் என்ப்படும் தத்துவங்களாம். ஆதலினால் மனத்தாலும் வாக்காலும் காயத்தாலும் அறியப்படாத பொருள் எதுவோ அது கடவுள் என்பது பெறப்பட்டது. அத்தகைய பொருளை நாத்திகர் காட்டச் சொல்வது அவர்கள் "மனம் வாக்குக் காயங்களால் அறியக் கூடாத பொருளை நாங்கள் எங்கள் மனம் வாக்குக் காயங்களால் அறியுமாறு, நீங்கள் உங்கள் மனம் வாக்குக் காயங்களால் அறியுமாறு, நீங்கள் உங்கள் மனம் வாக்குக் காயங்களால் அறியுமாறு, நீங்கள் உங்கள் மனம்வாக்குக் காயங்களைக் கொண்டு காட்டுங்கள்" என்று கேட்பது போலாம். இக்கேள்வி மூடக்கேள்வியாகையால், அவ்வாறு கேட்கும் மூடர்களைத் தெருட்டுவது எவ்வாற்றானும் கூடாதென்பதை யுன்னியே நாம் முதலில் அவர்களுடன் உரையாடாமல் மெளனமாயிருப்பது.

உரையுணர்விறந்த ஒருபெரும்பொருளே கடவுள் ஆதலால் அப்பொருளை உரையும் உணர்வும் அற்ற நிலையினரே அறிதற்பாலார். ( இவ்விடத்தில் உணர்வு என்பது சடப்பொருளாகிய கரணங்களாற் சுட்டியறியும் அறிவை). உரையுணர்வற்ற நிலையே மனமும் வாக்கும் இறந்த நிலையெனவும், பரமஞான நிலையெனவும் மோன நிலையெனவும் சொல்லப்படும். இது மோனமென்பது " ஞான வரம்பு" என்பதனால் உணரப்படும். அந்நிலை கடவுளோடு அது வதுவாய் (அத்துவிதமாய்) இருந்து இன்பம் நுகர்வதாகிய அநுபவ மாத்திரமா யிருப்பதன்றி, வாயினாலெடுத்துரைக்கப்படுவதன்று. இதுபற்றியே மேலோர் "கண்டவர் விண்டிலர், விண்டவர் கண்டிலர்" என்பர். நமது காரைக்காலம்மையாரும் திருமூலநாயனாரும் முறையே.

அன்றுந் திருவுருவங் காணாதே யாட்பட்டே
னின்றுந் திருவுருவங் காண்கிலே - னென்றுந்தா
னெவ்வுருவோ னும்பிரா னென்பார்கட் கென்னுரைக்கே
னெவ்வுருவோ நின்னுருவ மேது எனவும்,

உரையற்ற தொன்றை யுரைசெய்யு மூமர்காள்
கரையற்ற தொன்றைக் கரைகாண லாகுமோ
திரையற்ற நீர்போற் சிந்தை தெளிவார்க்குப்
புரையற் றிருந்தான் புரிசடையோனே.

எனவும் அருளிச் செய்தார்கள்.

ஒருவன் மரணாவஸ்தைப்படும்போது அவனுடைய சுற்றத்தார்கள் அவனைநோக்கி "அப்பா, நீபடும் வேதனையை நாங்கள் அறியச் சொல்" என்று கேட்டால் அவன் "ஐயோ, நான்படும் வேதனையை உங்களுக்கு எவ்வாறு தெரிவிப்பேன்" என்றான். இப்படியே ஸ்திரீ புருஷர்கள் ஒருவரை யொருவர் மருவி அனுபவிக்குங் கலவி யின்பத்தைப் பிறர்க்குச் சொல்ல இயல்வதில்லை. இச்சிற்றன்பமும் அனுபவமாத்திரமாயிருப்பது மாத்திரமின்றி, அதற்குரிய பருவம் வந்தபிறகே அனுபவத்திற்கு வருகிறது. இதனை "கன்னிகை யொருத்தி சிற்றின்பம் வேம்பெனினுங் கைக்கொள்வள் பக்குவத்தில், கணவனருள் பெறின் முனே சொன்னவா றென்னெனக் கருதி நகையாவள்" என்னுந் தாயுமானசுவாமிகள் திருவாக்கும் உணர்த்தும். அதுபோல் பேரின்பமயமாயிருக்கும் கடவுளை மலபரிபாகம் பெற்ற ஞானிகளும் இரண்டறக்கூடி இன்ப மார்ந்திருப்பரேயன்றி பிறர்க்கெடுத்துரையார். ஆதலால், நாமும் நாத்திகர் கேட்கும் கேள்விக்கு விடை வாயினாற் சொல்லப்படுவதன்று என்பதைக் குறிப்பாய் உணர்த்தவேண்டி மெளனமாயிருந்து விடுவோம்.

இனி "கடவுள் உண்டு என்பவர்க்கு உண்டு, இல்லை யென்பவர்க்கு இல்லை" என்பதை விளக்குவாம். ஒருவன் தன் குழந்தையின் மீது வைத்த (பற்று எனப்படும்) அன்பினால் அக்குழந்தையைக் காணும்போதும், அதின் சொற்களைக் கேட்கும்போதும், அதைத் தீண்டும்போதும் இன்பம் அடைகின்றான். அவ்வாறே மனைவி மாடு வீடு முதலியவற்றினிடத்தும் வைத்த அன்பினால் இன்பம் அடைகின்றான். இதனால் பிரபஞ்சத்தில் உயிர்களுக்கு உண்டாகும் இன்பத்திற்குக் காரணம் பிரபஞ்சப்பொருள்களிடத்தில் வைத்த அன்பே என்பதும், அன்பு எங்கு உண்டோ அங்கு இன்பம் உண்டு என்பதும் விளங்கும். சிறியபொருளாகிய பிரபஞ்சத்தில் வைத்த அன்பினால் சிற்றின்பம் உண்டாவதுபோல் பெரிய பொருளாகிய கடவுளிடத்தில் வைத்த அன்பினால் பேரின்பம் தோன்றும். இதனை "அன்பினில் விளைந்தவாரமுதே" என்னுந் திருவாசகத்தாலுணர்க. இன்பம் கடவுளின் உருவமாதலாலும் அவ்வின்பம் அன்பினால் உண்டாவதனாலும், அன்பிலார்க்கு இன்ப முமில்லையாகையாலும், கடவுளை விசுவசித்து அன்புசெய்வார்க்கு அவர் உளராகவும், அன்பு செய்யாதவர்க்கு இலராகவுமிருக்கிறார்.

அன்றியும் "குழந்தையுந் தெய்வமுங் கொண்டாடுமிடத்தில்" என்னும் பழமொழியின்படி குழந்தையானது தன்னை ஆசையோடு செல்வமே கண்ணே கண்மணியே யெனப் பலகூறி கையிலேந்தியும் மார்போடணைத்தும் முத்தமிட்டும், பாலூட்டியும், தாலாட்டியும், வளர்ப்பவர்களிடம் தானும் ஆசையோடு சென்று அவர்கள் மடிமீதிருந்து விளையாடுவது போல், கடவுளும் தம்மைநேசித்து அபிஷேகித்தும், அலங்கரித்தும், அருச்சித்தும், தோத்திரங்கள் பாடியும் திருவிழாக்கொண்டாடியும், வணங்குவார்க்கு எளியராய் அவர் சிந்தையைக் கோயிலாகக் கொண்டு வெளிப்பட்டருளுவர். மற்றவர்களுக்கு அவ்வாறு வெளிப்பட்டருளுவதில்லை.

தமிழ்வேதம்

எந்தை யீசனெம்பெருமா னேறமர் கடவுளென்றேத்திச்
சிந்தை செய்பவர்க்கல்லால் சென்று கைகூடுவதன்றால்
கந்தமாமலருந்திக்கடும் புன னின்வாமல்குகரைமே
லந்தண்சோலை நெல்வாயி லரத்துறையடிகடம்மருளே.

வைத்தநிதியேமணியே யென்றுவருந்தித்தஞ்
சிந்தைநைந்துசிவனே யென்பார்சிந்தையார்
கொத்தார்சந்துங்குரவும் வாரிக்கொணர்ந்துந்தி
முத்தாறுடையமுதல்வர்கோயின்முதுகுன்றே.

உலகத்தில் கடவுள் உண்டு என்று நம்பி அவரை வழிபடுவோருள்ளும் தம்முடைய அன்பெல்லாம் மனைவி மக்களிடத்திலும் செல்வ முதலியவற்றிலுமே அழுந்தவைத்திருப்பவர்களுக்கும் கடவுள் இலராகவேயிருக்கின்றார். இவ்வாறு சிற்றின்பப் பிரியராய் பிரபஞ்ச வாழ்க்கையையே பெரிதாக மதித்துக் கடவுளையும் அவராலுண்டாகும் பேரின்பத்தையும் இழப்பார்க்கு இரங்கியே நமது மாணிக்க வாசகசுவாமிகள்.

தினைத் தனையுள்ளதோர் பூவினிற்றேனுண்ணாதே
நினைத் தொறுங்காண்டொறும் பேசுந்தொறுமெப்போதும்
அனைத் தெலும்புண்ணெக வானந்தத்தேன்சொரியும்
குனிப்புடையானுக்கே சென்றூதாய்கோத்தும்பீ.

என்றருளிச்செய்தனர்.

கடவுளை அவரருளையே கண்ணாகக் கொண்டு காணவேண்டுமே யன்றி ஆணவமலத்தால் மழுங்கிக் கிடக்கும் சுட்டுணர்வைக் கொண்டு காணலாகாது.

அருளைக் கண்ணாகக் கொண்டு காணும் ஞானிகளுக்குப் பேரொளியாகிய பரசிவம் தோன்றும்; பிரபஞ்சந் தோன்றாது. சுட்டி யறியும் அறிவைக் கொண்டு காணும் ஏனையோர்க்கு அந்தகாரமாகிய பிரபஞ்சந்தோன்றும்; சிவம் தோன்றாது.

தாயுமானசுவாமிகள் பாடல்

"அருளாலெவையும் பாரென்றான் - அத்தை, யறியாதே சுட்டி யென் அறிவாலே பார்த்தேன் - இருளான பொருள் கண்ட தல்லால் - கண்ட வென்னையுங் கண்டில னென்னேடி தோழி - சங்கர சங்கர சம்பு."

திருத்தாண்டகம்

"மைப்படிந்த கண்ணாளுந்தானுங் கச்சிமயானந்தான் வார்சடையானென்னினல்லா. னொப்புடையனல்ல னொருவனல்ல னோரூரனல்ல னோருவமனில்லி, யப்படியு மந்நிறமு மவ்வண்ணமு மவனருளே கண்ணாகக் காணினல்லா, லிப்படிய னிந்நிறந்த னிவ்வண்ணத்த னிவனிறைவ னென் றெழுதிக் காட்டொணாதே."

இவ்வாறு, சுத்தாத்வைத சித்தாந்த சைவநெறியைக் கடைப் பிடித்துச் சரியை கிரியா மார்க்கங்களிலிருந்து தம்மை வழிபடுவார்க்குச் சிவபெருமான் படர்க்கையாகவும், சிவயோகிகளுக்கு முன்னிலையாகவும், சிவஞானிகளுக்குத் தன்மையாகவும் இருந்து, அருள்செய்வதனாலும், அவரை வழிபடாதவர்க்கு அவர் அவ்வாறிருந்து அருள் செய்தலில்ல்லாமையாலும், நாம்" கடவுள் உண்டு என்பவர்க்கு உண்டு, இல்லை யென்பவர்க்கு இல்லை" என்பது.

திருவாசகம்

வானாகி மண்ணாகி வளியாகி யொளியாகி
யூனாகி யுயிராகி உண்மையுமா யின்மையுமாய்
கோனாகி யானெனதென் றவரவரைக் கூத்தாட்டு
வானாகி நின்றாயை யென்சொல்லி வாழ்த்துவனே.

("சைவம்" 1917 டிசம்பர் மாத இதழில் இடம் பெற்ற கட்டுரை).

பெண்களுக்கு மட்டும் !

2009-08-19T03:31:00.000-07:00

பெண்களுக்கான அழகிய மெகந்தி டிசைன்கள்.,,,

கிருஷ்ண ஜெயந்தி

2009-08-11T02:47:00.000-07:00

பகவான் கிருஷ்ணர் அவரது மனைவி ருக்மணியுடன் , துவாரகையில் வசித்து வந்தார். ஒரு நாள் ஒரு முனிவர் , கண்ணா ! உன்னுடைய தலை சிறந்த அன்பு கொண்டிருப்பது யார் எனக் கேட்டார் ?, ருக்மணி தன் பேரை தான் பகவான் சொல்லுவார் என ஆவலுடன் எதிர் பார்த்து இருந்தாள். அப்போது கிருஷ்ண பரமாத்மா சொன்னார், என் மேல் அதிகமான அன்பு வைத்திருப்பது ராதா தான், என்றார். ருக்மணி கோபத்துடனும், பொறாமையுடனும் உள்ளே சென்று விட்டாள். கிருஷ்ணர் புன்னகைத்து கொண்டார்.

சில நாட்கள் கழித்து, கிருஷ்ணர் ஒரு நாள் தீராத வயிற்று வலி வந்து மிக வேதனையுடன் அவதிப்பட்டார். ருக்மணி பதறி போய், மருந்து களை அளித்தாள், இருந்தும் வலி குறையவில்லை., கிருஷ்ணரின் வேதனையும் தீரவில்லை.

அப்போது அங்கு வந்த நாரத முனிவர், இந்த வலி தீர வேண்டுமானால் , பகவானின் உண்மையான பக்தர் யாராவது, தன் பாதங்களை கழுவி அந்த நீரை சிறுது பகவானுக்கு கொடுத்தால் , அவரின் வலி தீர்ந்து விடும் என்றார்.

உடனே கிருஷ்ணர் , ருக்மணியிடம் , உன் பாதங்களை கழுவி அந்த நீரை உடனே கொடு , என்னால் வலி பொறுக்க முடியவில்லை என்று கெஞ்சினார்.

திடுக்கிட்டு போன ருக்மணி சொன்னாள், நீங்களோ உலகை எல்லாம் காக்கும் கடவுள் , உங்களுக்கு என் பாதம் பட்ட நீரை அளித்தால், நிச்சயம் எனக்கு நரகம் தான் கிடைக்கும் ! இப்படி ஒரு பாவ செயலை செய்ய நான் ஒரு போதும் சம்மதிக்க மாட்டேன் என்று கண்டிப்பாக கூறி விட்டாள்.

கிருஷ்ணர் , நாரதரை அழைத்து , நீங்கள் பிருந்தாவனத்துக்கு சென்று யாரிடமாவது , என் நிலைமையை எடுத்து கூறி , உடனே அவர்களின் பாதம் கழுவிய நீரை பெற்று வாருங்கள் , என்று அனுப்பி வைத்தார்.

சிறிது நேரத்திலேயே நாரதர் ஒரு கிண்ணத்தில் நீருடன் வந்தார் . கிருஷ்ணர் அந்த நீரை சிறிது பருகிய உடனேயே அவரின் , வயிற்று வலி சட்டென குணமாகி விட்டது. பழைய நிலைமைக்கு திரும்பி விட்டார்.

ருக்மணி நாரதரிடம் ஆவலாய் , யார் சுவாமி , பகவானுக்கு பாத நீரை தைரியமாக கொடுத்தது ? என்று கேட்டாள் . நாரதர் சொன்னார் , நான் போய் பிருந்தாவனம் முழுதும் சுற்றி பகவானின் நிலைமையை எடுத்து கூறி கேட்டும் யாரும் கொடுக்க தயாராக இல்லை ! அப்போது ஒரு சிறுமி வந்து தன் பாதங்கள் கழுவிய நீரை கொடுக்க ஓடி வந்தாள். அவளது தோழியர் அவளிடம் , ராதை ! நீ பெரும் பாவத்தை செய்ய போகிறாய் ! பகவானுக்கு உன் பாதம் பட்ட நீரை கொடுத்தால் நீ ஏழு ஜென்மத்திற்கும் நரகத்தில் தள்ள படுவாய் ! என்று தடுத்தனர்., ஆனால் அதற்கெல்லாம் கவலை படாத ராதை கூறினாள், " எனக்கு என்ன நடக்கும் என்பது பற்றி எனக்கு கவலை இல்லை ! ஆனால் என் பகவான் கிருஷ்ணர் , வலியில் அவதி படுவதை என்னால் தாங்க முடியாது " என்று கூறி , அவள் தான் கொடுத்தாள், என்றார்.

ருக்மணி பக்கம் திரும்பிய கிருஷ்ணர் ," பார்த்தாயா ருக்மணி , எனக்காக ராதை நரகத்திற்கு கூட செல்ல தயாராகி விட்டாள் ! அவள் என்னை பற்றி மட்டுமே கவலை பட்டாள் . தனக்கு என்ன நேர்ந்து விடுமோ என தன்னை பற்றி எள்ளளவும் கவலை படவில்லை " இதுவன்றோ உண்மையான அன்பு , எந்த நிபந்தனைகளும் அற்றது ! தியாக உணர்வு கொண்டது !! இதுவே தலை சிறந்த பக்தி , ராதையே தலை சிறந்த பக்தை என்றார், தலை குனிந்து ருக்மணி ஒப்பு கொண்டாள்.

டிஸ்கி : நமக்கு என்ன நடக்கும் என நினைத்து செய்யப்படும் எந்த செயலும் அன்பின் பாற்பட்டது ஆகாது ! ஆகவே எதிர் பார்ப்பில்லாத அன்பினை உலகிற்கு அளிப்போம் ! !!

ஆதலினால் காதல் செய்வீர் !

2009-07-22T21:16:00.000-07:00

ஒரு ஆசிரியர் , மாணவர்களிடம் " கோபம் வந்தால் நாம் ஏன் சத்தமாக பேசுகிறோம் ? மக்கள் ஆத்திரத்தில் ஆவேசமாக உரத்த குரலில் பேசி சண்டை இட்டு கொள்வதேன் ? ,என்று கேட்டார்.
ஒரு மாணவன் எழுந்து , " கோபம் வரும் போது, நாம் அமைதியை இழந்து விடுகிறோம்,அதனால் கத்துகிறோம் " என்றான் .
" சரி, ஆனால் நம்மை கோபப் படுத்திய நபர் ,மிக அருகில் இருக்கும் போது , உரத்த குரலில் ,தடித்த வார்த்தைகளில் பேசுவதின் காரணமென்ன ? நாம் சொல்ல நினைப்பதை மெதுவான குரலில் ஏன் சொல்ல முற்படுவதில்லை ? " - ஆசிரியர் .
மாணவர்கள் பல பதில்கள் சொன்னாலும் , அவை சரியான காரணத்தை விளக்காததால் , ஆசிரியர் தொடர்ந்தார்., " இரு மனிதர்கள் கோபப் படும் போது , அவர்களின் இதயத்துக்கு இடையே ஆன தூரம் மிக அதிகரித்து விடுகிறது, அந்த இடைவெளியினில் பேசுவது கேட்க வேண்டும் என்பதற்காகவே , இருவரும் உரத்த குரலில் பேசுகின்றனர். எவ்வளுக்கெவ்வளவு கோபம் உள்ளதோ , அவ்வளவு சத்தம் தேவைப் படுகிறது.,
அன்பு வயப்பட்ட இருவர் ( நண்பர்கள் /காதலர்கள் ) பேசும் போது
சத்தம் போட்டு பேச அவசியம் இருக்காது ,ஏனெனில் அவர்களின் இதயத்துக்கு இடையே ஆன தூரம் மிக குறைந்து விடுகிறது.
மனமொத்த காதலர்கள் பேச வேண்டிய அவசியம் கூட இருப்பதில்லை , ஒருவர் முனுமுணுத்தாலே, மற்றவர் புரிந்து கொள்வார். ஏனெனில் அங்கு இதயங்களுக்கு இடையே இடைவெளியே இருக்காது .
இறுதியாக இதய பரிமாற்றம் செய்து கொண்ட காதலர்களுக்கு ,வார்த்தை பரிமாற்றமே தேவை படுவதில்லை .கண்களின் மூலமே பேசி கொள்கின்றனர்.

டிஸ்கி : விவாதங்களின் போது இதயங்களை தூரப் போகும் படியான வார்த்தைகளை உபயோகிக்காதீர்கள் ., மற்ற இதயங்களுக்கு செல்லும் பாதை ஒருவழிபாதை., ஒரு முறை தூரமாக சென்று விட்டால் ,மறுமுறை அருகில் வருவது கடினம்.,

எங்கேயோ படித்த கவிதை :
என் மௌனமே உனக்கு
புரியா விட்டால் ,
வார்த்தைகளால்
என்ன பயன் ?

கர்ம வீரர் பிறந்த நாள் - சில நினைவுகள்

2009-07-14T20:51:00.000-07:00

1971 - ஆம் ஆண்டு நடந்த பொதுத் தேர்தலில் இந்திரா காங்கிஸ் அமோக வெற்றி பெற்றது. காமராஜர் சார்ந்திருந்த பழைய காங்கிரஸ் படுதோல்வி அடைந்திருந்தது.

தொண்டர்கள் காமராஜரிடம் வந்து,

”ஜயா! அவர்கள் வெற்றிக்கு காரணம் ”ரஷ்ய மை” வைத்து ஏமாற்றி விட்டார்கள். வாக்குச் சீட்டில் ரஷ்ய மை தடவிவிட்டார்கள்” என்று கூறினார்கள்.

இதைக் கேட்ட காமராஜர்,

”ஜனநாயகத்திலே நம்பிக்கை உள்ளவர்களின் பேச்சா இது. நாம் தேர்தலிலே தோற்றதிற்குக் காரணம் ‘மை’ என்கிறீர்களே! அதுவா உண்மை? இல்லை. நம்மை மக்கள் ஏற்றுக் கொள்ளவில்லை என்பதுதான் உண்மை” - என்றார்.

முதலமைச்சர் ஆனதும் காமராஜர் பேசிய பேச்சில் ,

” நான் ஏழைகளின் துயர் நீக்கவே முதலமைச்சர் பதவியை ஏற்றுக்கொண்டுள்ளேன். அதற்கு இடமில்லை என்றால் எனக்கு இப்பதவி தேவை இல்லை.” என்றார்.

ஏழையாகப் பிறந்து, எளிமையாக வாழ்ந்து, எந்தச் சூழ்நிலையிலும் ஏழைகளின் துயரங்களை நீக்கவே எண்ணிப் பாடுபட்ட காமராஜரை ”ஏழைப் பங்காளன்” என்று சொல்வதிலே தவறில்லை தானே.

அப்போது காமராஜர் பதவியில் இல்லை. நாகர்கோயில் தொகுதி நாடாளுமன்ற உறுப்பினராக மட்டும் இருந்தார். தி.மு.க. ஆட்சி தமிழகத்தில் நடந்து கொண்டு இருந்தது.

அமெரிக்க அதிபர் நிக்ஸன் இந்தியாவுக்குச் சுற்றுப் பயணம் வந்திருந்தார். அவர் பெருந்தலைவர் காமராஜரைச் சந்திக்க விரும்பினார். புது டெல்லியிலிருந்து தேதி மற்றும் நேரம் கேட்டுத் தகவல் வந்திருந்தது. இதைக் காமராஜரிடம் கூறினார்கள்.

”பார்க்க முடியாதுன்னேன்” - என்று காமராஜர் பதில் சொல்லி விட்டார். ஏன் இப்படிச் சொல்கிறார்? வந்து பார்க்க விரும்புவதோ அமெரிக்க அதிபர். குழப்ப மடைந்தார்கள் கூடியிருந்தவர்கள்.

அவர்களைப் பார்த்துக் காமராஜர் சொன்னார். அண்ணாத்துரை அமெரிக்கா சென்றிருந்தார். அப்போது அவர்அமெரிக்கா அதிபர் நிக்ஸனைச் சந்திக்க விரும்பினார். பார்க்க மறுத்திவிட்டாராம் நிக்ஸன். அப்படிப்பட்டவரை நான் ஏன் பார்க்க வேண்டும்” என்றார் காமராஜர்.

இது காமராஜர், தானும் ஒரு தமிழன் என்று தன்மானத்தையும், மாற்றுக் கட்சிக்காரர் என்றாலும் அண்ணாத்துரைக்கு அமெரிக்க அதிபர் சந்திக்கச் சந்தர்ப்பம் கொடுக்காததற்குக் கண்டனமும் தெரிவித்ததையும் தானே காட்டுகிறது.

லஞ்சத்தை தடுக்க இப்பிடி ஒரு வழி !!

2009-07-03T23:26:00.000-07:00

நேபாள நாட்டு விமான நிலையத்தில் ஊழியர்கள் சரமாரியாக லஞ்சம் வாங்குவதைத்
தடுக்க ஊழியர்களுக்கு பாக்கெட்களே இல்லாத பேன்ட்களை கொடுக்க அந்த நாட்டு ஊழல் ஒழிப்பு
வாரியம் திட்டமிட்டுள்ளதாம்.

நேபாள நாட்டில் ஒரே ஒரு விமான நிலையம்தான் உள்ளது. தலைநகர் காத்மாண்டுவில் உள்ள
திரிபுவன் சர்வதேச விமான நிலையத்தில் உள்ள ஊழியர்கள், பயணிகளிடம் பெருமளவில் லஞ்சம்
வாங்குவதாக குற்றச்சாட்டுக்கள் எழுந்தன.

இதை ஒழிக்க தற்போது வித்தியாசமான ஐடியாவை உருவாக்கியுள்ளது நேபாள லஞ்ச ஒழிப்பு வாரியம்.

இதுகுறித்து அந்த அமைப்பின் செய்தித் தொடர்பாளர் ஐஸ்வரி பிரசாத் பெளத்யால் கூறுகையில்,
பெருமளவில் புகார்கள் வந்ததால் கண்காணிப்புக் குழுவை விமான நிலையத்திற்கு அனுப்பினோம்.
அதில் லஞ்சம் வாங்குவது உண்மை என்று தெரிய வந்தது.

இதையடுத்து விமான நிலைய ஊழியர்களுக்கு பாக்கெட்டே இல்லாத பேன்ட்களைக் கொடுக்க முடிவு
செய்துள்ளோம். இதுதொடர்பாக விமானப் போக்குவரத்துத் துறைக்கு பரிந்துரையை
அனுப்பியுள்ளோம். விரைவில் இது நடைமுறைக்கு வரும்.

இதன் மூலம் ஓரளவு லஞ்சம் குறையும் என நம்புகிறோம். இதற்கும் ஊழியர்கள் கட்டுப்படாவிட்டால்
அவர்களை வேலையிலிருந்து நீக்குவது ஒன்றுதான் வழி என்றார்.

நேபாள நாட்டின் முக்கியத் தொழிலே சுற்றுலாதான். இங்கு 3 லட்சம் பேர் சுற்றுலாவை நம்பி
உள்ளனர்.

கடந்த ஆண்டு நேபாளத்திற்கு 4.50 லட்சம் பேர் சுற்றுலா வந்தனர். இந்த ஆண்டு 10 லட்சம் பேரை
ஈர்க்க நேபாளம் திட்டமிட்டுள்ளது. ஆனால் விமான நிலையத்தில் நிலவும் இந்த லஞ்சப் பேயால்
பயணிகள் பெருமளவில் அதிருப்திக்குள்ளாவதாக புகார்கள் குவிந்ததைத் தொடர்ந்து அவர்களது
பாக்கெட்டில் கை வைத்துள்ளது அரசு.

வரவேற்போம், வணங்காமன் கப்பலை !

2009-07-02T21:31:00.000-07:00

வணங்காமன்னுக்கு அனுமதி கிடைத்து விட்டது .

இலங்கை தமிழர்களுக்கான நிவாரண பொருட்களை சுமந்து வந்த வணங்காமண்
கப்பல் சென்னை துறைமுகத்துக்குள் நுழைய அனுமதி அளிக்கப்பட்டுள்ளது.

ஐரோப்பிய வாழ் தமிழர்கள் கேப்டன் அலி என்ற கப்பலுக்கு வணங்காமண் என பெயர்
சூட்டி சுமார் 884 டன் எடை கொண்ட நிவாரண பொருட்களை அனுப்பி வைத்தனர்.

கடந்த மாதம் 4ம் தேதி இலங்கை வந்த அந்த கப்பலில் ஆயுதங்கள் இருக்கலாம் என
கூறி இலங்கை அரசு அங்கிருந்து வெளியேற்றியது. இதையடுத்து சென்னை நோக்கி
வந்த கப்பலுக்கு இந்திய கப்பற்படையும் சோதனை கொடுத்தது. அந்த கப்பலை
சென்னை துறைமுகத்துக்கு வெளியே நடுக்கடலில் நிறுத்தி வைத்தது.

இதையடுத்து வணங்காமண் கப்பலை சென்னைக்கு துறைமுகத்துக்கு கொண்டு வர
அனுமதி வேண்டும் என தமிழக முதல்வர் கருணாநிதி உள்ளிட்ட பலரும்
வலியுறுத்தினர்.

இந்நிலையில் மனிதாபிமான நடவடிக்கையாக இந்த கப்பலை சென்னை துறைமுகத்துக்கு
வர அனுமதி அளிப்பதாக மத்திய கப்பல்துறை போக்குவரத்து அமைச்சர் ஜி.கே.
வாசன் தெரிவி்த்துள்ளார்.

இதை தொடர்ந்து சென்னை துறைமுக பொறுப்புக் கழகத் தலைவர் கேப்டன் சுபாஷ்
குமார் கூறுகையில்,

வணங்காமண் கப்பல் சென்னை துறைமுகத்துக்கு வர அனுமதியளிக்கப்பட்டுள்ளது.
அதை நான்காவது தளத்தில் நிறுத்தும் வகையில் ஏற்பாடு செய்யப்பட்டுள்ளது.
அந்த கப்பல் இங்கு வந்தவுடன் அதில் இருக்கும் பொருட்களை உள்ளூர்
போலீசாரும், கப்பற்படையும் சோதனையிடுவார்கள்.

அதன் பின்னர் இந்த பொருட்கள் வேறொரு கப்பல் மூலம் இன்னும் நான்கு
நாட்களில் கொழும்பு அனுப்பி வைக்கப்படும் என்றார் சுபாஷ் குமார்.

அங்கிருந்து செஞ்சிலுவைச் சங்கம் மூலம் இந்த நிவாரணப் பொருட்கள்
தமிழர்களுக்கு வினியோகிக்கப்படும்.

புகைக்கு தடை - ஒபாமா சட்டம்..

2009-06-30T21:23:00.000-07:00

இனியாவது திருந்துங்க புகை பிடி கலைஞர்களே !

இளைஞர்களிடையே நிலவும் புகை பிடிக்கும் பழக்கத்திற்குத் தடை விதிக்கும்
வகையிலான புதிய சட்டம் அமெரிக்காவில் அமலுக்கு வந்துள்ளது.

குடும்ப புகை பிடித்தல் தடை மற்றும் புகையிலைக் கட்டுப்பாட்டுச் சட்டம் என்ற பெயர் கொண்ட
இந்த சட்டத்தை அமல்படுத்தும் பொறுப்பை அந்நாட்டு உணவு மற்றும் மருந்துத்துறை மேற்கொள்ளும்.

இந்த சட்டத்தின் மூலம் இளைஞர்களை அதிகம் கவரும் வாசனையான சிகரெட் மற்றும் சிறிய வகை
சிகரெட்கள் தடை செய்யப்படும்.

மேலும், லைட்ஸ், மைல்ட் என்ற பெயரில் வெளி வரும் சிகரெட்களுக்கும் தடை விதிக்கப்படும்.
இதுதவிர புகையிலைப் பொருட்கள் மீது கண்டிப்பாக இனி எச்சரிக்கை வாசகங்களையும் பொறிக்க
வேண்டும்.

அதேபோல இனிமேல் தயாரிக்கப்படும் சிகரெட்களில் நிக்கோடின் அளவையும் சிகரெட் தயாரிப்பு
நிறுவனங்கள் குறைக்க வேண்டும்.

இந்த சட்டத்தில் கையெழுத்திடும் நிகழ்ச்சி அமெரிக்க வெள்ளை மாளிகையின் ரோஸ் கார்டனில் நடந்தது.

அப்போது ஒபாமா பேசுகையில் பல காலமாகவே நாம் எதிர்பார்த்து வந்த மாற்றத்தை இந்த சட்டம்
[^] தரும். நமது குழந்தைகளை அபாயத்திலிருந்து காக்க இந்த மாற்றம் வந்துள்ளது என்றார்.

அமெரிக்காவில் புகை பிடிக்கும் பழக்கத்தால் பலர் இறக்கிறார்கள். இறப்பு அளவு குறைந்த
போதிலும் கூட ஆண்டுக்கு 4 லட்சம் பேர் புகை பிடிக்கும் பழக்கத்தால் உயிரிழக்கிறார்கள்.
புகை பிடிக்கும் பழக்கத்திற்கு அடிமையானவர்கள் ஆண்டுதோறும் செலவழிக்கும் தொகை 100
பில்லியன் டாலராக உயர்ந்துள்ளது.

அமெரிக்க அரசின் இந்த சட்டத்தை பிரபல சிகரெட் தயாரிப்பு நிறுவனமான ஆல்ட்ரியா குரூப்
வரவேற்றுள்ளது. இருப்பினும் புகை பிடிக்கும் பழக்கத்தால் ஏற்படும் தீய அம்சங்கள் குறித்து
இளைஞர்களிடம் பிரசாரம் செய்ய வேண்டும் என இது கூறியுள்ளது.

இந்த நிறுவனத்தின் தயாரிப்புதான் மால்போரோ, விர்ஜீனியா ஸ்லிம்ஸ், பேசிக், செஸ்டர்பீல்ட்
ஆகியவை என்பது குறிப்பிடத்தக்கது.

இருப்பினும் அமெரிக்க இளைஞர்களிடையே கணிசமான அளவுக்கு இந்த சட்டத்திற்கு எதிர்ப்பும்
காணப்படுகிறது.

52 சதவீதம் பேர் இதை எதிர்த்துள்ளனர். 46 சதவீதம் பேர் ஆதரித்துள்ளனர்.

சட்டத்தில் கையெழுத்திட்ட பின்னர் ஒபாமா இப்படிச் சொன்னார் - சிகரெட்டை கைவிடுவது என்பது
இளைஞர்களுக்கு குறிப்பாக டீன் ஏஜ் வயதினருக்கு எவ்வளவு கஷ்டம் என்பது எனக்குத் தெரியும்.
நானும் ஒரு காலத்தில் டீன் ஏஜில் இருந்தவன்தான். இருப்பினும் முயன்றால் முடியாதது இல்லை
என்றார் ஒபாமா.

ஆகஸ்ட் 7 ஆம் தேதி என்ன ஆச்சர்யம் ?வாழ்க்கையில் ஒரே ஒரு முறை நிகழும் அதிசயம் !!

2009-06-18T22:26:00.000-07:00

ஆகஸ்ட் 7 , 2009 . பகல் 12 மணி,34 நிமிஷம் 56 செகண்டு, இந்த நொடி நம் வாழ்வில் ஒரு முறை மட்டுமே வரும் அதிசய நொடி. அப்போது நேரமும் ,தேதியும் இவ்வாறாக இருக்கும் .....

12:34:56 07/08/09 1 2 3 4 5 6 7 8 9 இது போல் ஒரு நொடி இனியும் வருமா ?

ஒரு idea உங்களை மாற்றலாம் ! ஒரு பெண் உங்கள் idea வை மாற்றலாம் !!

2009-06-18T21:53:00.000-07:00

ஹி,ஹி, இந்த ஐடியா எப்படி இருக்கு ?

உங்கள் வேலை உங்களுக்கு கடினமாக இருக்கிறதா ? இவர்களின் வேலையை பார்த்து விட்டு சொல்லுங்கள் !

2009-06-18T02:44:00.000-07:00

என்று ஒழியும் இந்த குழந்தை தொழிலாளர் முறை ?

மிரள வைக்கும் அலைகள் .

2009-06-14T20:42:00.000-07:00

மிரள வைக்கும் அலைகள் ஒரு அரிய படத் தொகுப்பு..

கடற்கரையில் அழகிகள் ............

2009-06-08T00:29:00.000-07:00

ஹி,ஹி.....

பசங்க - விமர்சனம் அல்ல

2009-06-03T22:17:00.000-07:00

பசங்க ???

................

பீச்சுக்கு போகலாம் வாங்க !!!

2009-05-28T00:08:00.000-07:00

கடற்கரையில் காலை நனைக்க விரும்புபவரா நீங்கள்., இதோ உங்களுக்காக ஜப்பான் பொறியாளர்களின் கைவண்ணத்தில் உருவாக்கப் பட்ட உலகின் அழகிய செயற்கை கடல் .

மதுரை பதிவர் சந்திப்பு - கேட்க மறந்த கேள்விகள்

2009-05-27T03:42:00.000-07:00

பதிவர்களிடம் சில கேள்விகள்

போன ஞாயிற்று கிழமை மதுரை ரேஸ் கோர்ஸில் பதிவர் சந்திப்பு நடந்தது , நீங்கள் அனைவரும் அறிந்த ஒன்றே. பதிவர் உலகிற்கு நான் புதுசு என்பதாலும் , வேற யாரையுமே இதுக்கு முன்னாடி பாத்தது இல்லை ங்கிரதாலும், அப்போ நான் கேக்க நினைச்ச கேள்விகளை ,இந்த பதிவு மூலமா கேட்டுடுறேன்., அதுக்கு சம்பத்த பட்டவுங்க மட்டும்தான் பதில் சொல்லனும்னு இல்லை., பதில் தெரிஞ்ச , சொல்ல நினைக்குற யாரு வேணும்னாலும் சொல்லுங்க ..............

1. தருமி ஐயா, விடம் முதல் கேள்வி : கடவுள் உங்க முன்னாடி தோன்றி உங்களுக்கு என்னா வரம் வேணும் னு கேட்டா நீங்க என்ன செய்வீங்க ( அல்லது ) கேப்பீங்க ?

2. சீனா ஐயா அவர்களிடம் உங்கள் வலை பதிவின் முதல் பக்கத்தில் ,அழகர் பாட்டு மிக

அழகாய் பாடி உள்ளீர்களே ? நீங்கள் பாடிய பாடல் தொகுப்பு எதுவும் வெளியிட்டது உண்டா ?

3.சாலிசம்பர் ஐயா அவர்களிடம், தனித்தமிழ் பற்றி நீங்கள் ஒரு விவாதத்தை அன்று ஏன் முன்வைக்க வில்லை?. சுவையாக இருந்திருக்குமே ?

4.சூப்பர் சுப்ரா ஐயா விடம் , நீங்க ஏன் அதிகம் பதிவதில்லை ?

5. இளையகவி கணேஷ் அவர்களிடம் தமிழ்ல இப்போ மொத்தம் எத்தன திரட்டி இருக்கு ? புதிய பதிவர் எல்லாத்துலயும் பதிவை இணைக்கனுமா ?

6.அண்ணன் வால்பையன் அருணிடம், மதுரை ல தண்ணி பஞ்சமா இருக்கே ? எப்டி சமாளிசீங்க ? ( H2O)

7. சில் பீர் அவர்களிடம் உங்க பேரை பதிவர் சந்திப்பில் விளக்கிய மாதிரி, விளக்கி ஒரு பதிவு எப்ப போடுவீங்க ?

8. ஸ்ரீ , அவர்களிடம் வலையில் மாட்டியது அப்டின்னு , அடிக்கடி பதிவு போடுறீங்களே, நீங்க எப்போ வலையில ( கல்யாணம் ) மாட்ட போறீங்க ?

9.அருண் அவர்களிடம், தமிழ் பதிவு எப்போ போடுவீங்க ?

10.நண்பர் கார்த்திகை பாண்டியன் அவர்களிடம்., followers சதம் எப்போ அடிக்க போறீங்க ? மடி கணினி வாங்கீட்டங்கள ?

11.நண்பர் பாலகுமாரிடம் , செல் போன் , தரீங்க ? வில் போன் தரீங்க ? பில் வராத போன் தருவீங்களா ?

12.டாக்டர் தேவன் மாயம் , அவர்களிடம், நீங்க அமெரிக்க பத்தி எத்தன பதிவு போட்டு இருக்கீங்க ? இன்னைக்கு சேர்த்தி ?

13.நண்பர் டக்ளஸ் ட்ட , JKR மன்றத்த இனி என்ன செய்ய உத்தேசம் ? அவருதான் இனி நடிக்க மாட்டாரே?

14.தம்பி , அன்பு கிட்ட , உன் லோகோ வில மரத்த செதுக்கி அன்பு ன்னு , இருக்கே ? அது நீ செதுக்குனதா ? இது மரத்தோட மட்டும்தானா ?

இது போக மதுரைக்கு வராத பதிவர்கள் , சக்கரை, கடைக்குட்டி, பழமைபேசி, ஆதவா, காடுவெட்டி, நையாண்டி நைனா, இன்னும் நான் படித்த எல்லார் கிட்டயும் கேட்க விரும்பும் கேள்விகள் நிறைய உண்டு ., அத அடுத்த பதிவுல கேக்குறேன்.

உங்க கேள்வி எதாவது இருந்தாலும் கேளுங்க ?

2009-05-26T23:46:00.000-07:00

அயன் சூர்யா புண்ணியத்தில் காங்கோ பற்றி அறிந்து கொண்ட நமக்கு இந்த படங்கள் காங்கோவின் இன்னொரு பக்கத்தை காட்டுகிறது.

Termite Field
காளான் பண்ணை , ஜாபான் அருகே.,.

இஸ்ரோ , மற்றும் வாஸ்டா நகரம் இடையே உள்ள கிராமங்களில் மக்கள் குடியிருப்பு

மரப் பாலம் ,இசிரோ நகரம்.

...................................................................................................................................................................

இதுவும் காங்கோ படம் தான். பேரு மயூரி காங்கோ, பாலிவுட் நடிகை. '' papa kahte hain '' என்ற மகேஷ் பட் படத்தில் அறிமுகம் ஆகி ஒரு பத்து படம் நடிச்சார். இப்போ காணாம போய்ட்டார்.

டைட்டானிக்.

2009-05-22T22:10:00.000-07:00

டைட்டானிக். கப்பல் கவிழ்ந்த போது வெளியான செய்திகள்

( E mail இல் வந்தது., ஏற்கனவே பார்த்தவர்கள் மன்னிக்கவும் )

செல் போனில் கரண்ட் இல்லாமல் சார்ஜ் ஏற வேண்டுமா?

2009-05-21T22:22:00.000-07:00

நீயும், நானும், என் செல் போனும்., மற்றவர்கள் அழைக்கும்போது என் செல் போன் உயிர்த்தெழுகிறது.., நீ , அழைக்கும் போதோ , என் செல்களெல்லாம் உயிர்த்தெழுகின்றன.

மற்றவர்கள் பேச பேச பேட்டரி சார்ஜ் குறைகிறது; ஆனால் நீ பேச பேச பேட்டரி சார்ஜ் கூடுகிறதே ? எப்படி ?

தினமும்

உயிர் வாழ தேவை , என் போனுக்கு ஒரு மணி நேர மின் இணைப்பு., எனக்கு ஒரு நிமிடமாவது உன் சொல் இணைப்பு.

மிஸ் டு கால் அதிகம்

கொடுத்த நீ , சொல்லாமல் ஒரு நாள், நம்பரை மாற்றினாய், நன்றாய் ஏமாற்றினாய்.

call தான் மிஸ் டு என்றால் ஆளும் மிஸ் டு .

-------------------------------------------------------------------------------------------------------------

------------------------------------------------------------------------------------------------------------

-------------------------------------------------------------------------------------------------------

-------------------------------------------------இவை முன்பு ஒரு காலத்தில் நானே கிறுக்கியவை,

காகிதத்தில் எழுதிய அத்தனையும்,கிழித்து போட்டு விட்டேன். இருப்பினும் ஞாபகத்தில் உள்ள வரிகளை எழுதி விட்டேன்., இனி உங்கள் கையில்.., மறக்காமல் பின்னோட்டம் இடுங்கள்.,

----------------------------------------

அண்ணன் , தம்பியை ஜெயித்த அழகிரிக்கு அமைச்சர் பதவி கிடைக்குமா?

2009-05-19T23:47:00.000-07:00

நடந்து முடிந்த பாராளுமன்ற தே தலில் காங்கிரஸ் சார்பில் முதன் முறையாக MP ஆக தேந்தெடுக்கப் பட்டிருக்கும், 57 வயதான திரு.கே.எஸ். அழகிரி , அவர்களுக்கு ஒரு தனி சிறப்பு உண்டு. இவர் தற்போது ஜெயித்துள்ள கடலூர் தொகுதியில் இவரை எதிர்த்து போட்டியிட்டு தோற்றுப் போன ,அதிமுக - எம்.சி. சம்பத், தே.மு.தி.க. - எம்.சி.தாமோதரன் ஆகிய இருவரும் உடன் பிறந்த சகோதரர்கள் என்பது சுவாரஸ்யமான விஷயம் . ஆக கழக உடன்பிறப்புகளின் உதவியோடு உண்மையான உடன் பிறப்புகளை வென்ற இவருக்கு அமைச்சர் ஆகும் வாய்ப்பு கிட்டுமா? இதற்கு முன் இரண்டு முறை சிதம்பரம் எம்.எல். ஏ ஆக இருந்தவர் என்ற தகுதியும் இவருக்கு உண்டு. அழகிரி அமைச்சர் ஆக வாழ்த்துவோம்!!!...

------------------------------------------------------------------------------------------------------------------------------

மேலே இன்னொரு படத்தில் இருப்பவர் திரு. மேத்யு ., மதுரை தேர்தல் பார்வையாளராக இருந்தவர், தேர்தல் முடிந்ததும் மற்ற பார்வையாளர்கள் அரசாங்க செலவில் விமானத்தில் ஊருக்கு சென்று விட்டனர். ஆனால் இவரோ மாட்டு தாவணி பஸ் ஸ்டாண்ட் போய், பஸ் பிடித்து சொந்த ஊர் திரும்பியிருக்கிறார். இவரை போன்றோரை வாழ்த்த வேண்டியது நம் கடமை அல்லவா ?

..................................--------------------------............................---------------------------------------

இன்னொரு செய்தியும் ஒரு நேர்மையான அதிகாரி பற்றியது தான், தமிழ்நாடு தலைமை தேர்தல் ஆணையர் திரு. நரேஷ் குப்தா வை , பா.ம.க. டாக்டர். ராமதாஸ் இவரை மாடு மேய்க்க போகலாம் என்று கூறியது. அரசியல் வாதிகள் , நேர்மையான அதிகாரிகளை இவ்வாறு விமர்சிக்கலாமா?

படம் பாத்து விடை சொல்லுங்க !!!

2009-05-17T23:43:00.000-07:00

எறும்பா? ஏரோ ப்ளேனா ?

வீர பாண்டி கோட்டையிலே....,

2009-05-11T02:34:00.000-07:00

14 ஆம் நூற்றாண்டில் எங்க ஊர, வீரபாண்டியன் என்ற ராசா ஒருத்தர் ஆட்சி செஞ்சுகிட்டு வந்தாராம். அப்போ அவருக்கு திடீர்னு நோவு வந்து, ரெண்டு கண்ணுலயும் பார்வை பறி போயிடுச்சாம் . அவரு பாக்காத வைத்தியம் இல்லே, போகாத கோவில் இல்லே, ஆனாலும் பார்வையே வரல. ரொம்ப மனசு ஒடஞ்சு போன ராசா, சரி, நாம இனி , பதவிய விட்டு விலகிட்டு, சாமியாரா போயிடுவோம் அப்டின்னு நினைச்சு தூங்கிட்டார். அப்போ அவரு கனவுல வந்த, சாமி ,நீ இப்படியே, வைகை கரையோரம் மேற்காலே நூறு கல் தொலைவு போனேன்னா , அங்கே '' நிம்பா ஆரண்யம் '' என்ற காட்டு பகுதி வரும், அங்கே நான் ஆற்றங்கரை ஓரம் சுயம்பு ஆக, எழுந்தருளியிருக்கிறேன்., மற்றும் அங்கே ஸ்ரீ கவுமாரி அம்மன் கோயில் உள்ளது . அங்கே போய் கும்பிட்டா உனக்கு திரும்ப பார்வை கிடைக்கும் னு, சொன்னாரு. உடனே அந்த ராசா, அந்த காட்டுக்கு வந்து ஆத்துல குளிச்சுட்டு, அம்மனை போய் மனமுருக வேண்டினார். உடனே அவருக்கு ஒரு கண்ணில் பார்வை வந்துடுச்சி. பிறவு, ஆற்றங்கரையோரம் லிங்க வடிவில் தானே எழுந்தருளியிருந்த சிவ பெருமானை வணங்கினார்., உடனே அவருக்கு ரெண்டாவது கண்ணுலேயும் , பார்வை வந்துச்சாம். மிக்க மகிழ்ந்த ராசா, அந்த லிங்கத்தை , ஸ்ரீ கண்ணிச்வரமுடையார் கோயில் என்ற பேரில் அழகான ஒரு கோவிலை ஆத்தங்கரை ஓரமா கட்டினார். பொறவு அந்த இடமே அந்த ராசா பேரால, வீரபாண்டி ன்னு ஆகி போச்சு.

அந்த கோவில்ல ஒவ்வொரு சித்திரை கடைசி செவ்வாய் கிழமை லேந்து , எட்டு நாள் ரொம்ப சிறப்பான திருவிழா நடக்கும். அதன் படி , நாளக்கி இந்த வருஷ விழா ஆரம்பிக்குது. அக்கினி சட்டி எடுப்பது, என்பது இங்க ரொம்ப பிரபலம். நெறைய ஊர்ல பல நாள் திருவிழா நடந்தா கூட ஒரு நாள் தான் அக்கினி சட்டி எடுப்பார்கள். ஆனால் இங்கே எட்டு நாளும் ராத்திரியும், பகலும் அக்கினி சட்டி எடுப்பார்கள்.

சக்தி வாய்ந்த இந்த அம்மனிடம் நேர்த்திக்கடன் செலுத்துதல் மிக முக்கிய நடைமுறை. தேனி மாவட்டத்தில் உள்ள அனைத்து குடும்பங்களிலும், யாராவது, ஒரு உறவினரோ, நண்பரோ, இங்கு அக்கினி சட்டி எடுக்காமல் பார்ப்பது அரிது.,மற்றவர்கள் அவரவர் வசதிக்கேற்ப, மாவிளக்கு எடுத்தல், ஆயிரம் கண் விளக்கெடுத்தல், மொட்டை போடுதல் , போன்ற பிரார்த்தனைகளில் ஈடு படுவர்.

அதே போல திருவிழா இல்லாத சமயங்களிலும் ,முகூர்த்த நாட்களில் திருமணங்கள் ஏராளமாக நடை பெறும்.

மதுரை ல ஓடுற ( ? ) வைகை ஆத்துக்கு முக்கிய ஆதாரமான முல்லை ஆறு இங்கே குளிக்க கூடிய அளவில் , சுத்தமாகவும், சுகாதாரமாகவும் ஓடுகின்றது. மதுரை லே இருந்து மேற்காலே 83KM தொலைவில இருக்கு. தேனி ல இருந்து கம்பம் போற ரோட் ல ஏழு கி. மீ. ல இருக்கு. தங்கும் வசதி எதுவும் இல்லை, தேனி க்குதான் வரணும். எட்டு நாள்ல உங்களுக்கு வசதி படுற ஒரு நாள் இங்க வந்து அம்மனையும், ஈசனையும், தரிசித்து அருள் பெறுங்கள்.

குப்புற படுத்து தூங்குபவரா , நீங்கள் ? இத அவசியம் படிங்க !

2009-05-07T21:55:00.000-07:00

இங்கிலாந்தில் சமீபத்தில் வெளியிடப்பட்ட ஆராய்ச்சி முடிவுகள் எப்படி, எப்படி தூங்குபவர்கள் , எப்படிப்பட்டவர்கள் என பின்வருமாறு தெரிவிக்கிறது ;

1. குப்புறப்படுத்து தூங்குபவர்கள், சோம்பேறித்தனம் மிகுதியாக உள்ளவர்கள்: உழைப்பில் ஆர்வம் இல்லாதவர்கள்: தங்கள் வேலையின் மீது பற்று இன்றி இருப்பர்.

2.சுருண்டு படுத்து உறங்குபவர்கள், கோழைகள் : எப்போதும் , எதற்கும், எதிலும் பிறர் ஆதரவை நாடி நிற்பவர்கள்.

3. மல்லாந்து படுத்து உறங்குபவர்கள் , தன்னம்பிக்கை மிக்கவர்கள் ,பொது நலனில் அக்கறை கொண்டவர்கள் ; பிறரை எளிதில் கவரும் ஆற்றல் கொண்டவர்கள் !

----- இவ்வாறு கூறுகிறது. இதில் நீங்கள் எந்த ரகம் ?முதல் இரண்டு ரகமாக இருந்தால் , இன்றிலிருந்து மல்லாந்து படுத்து பாருங்கள் .

அதே போல ஒருவர் பேசும் போது செய்யும் சேஷ்டை களில் இருந்து அவரது குணம் இவ்வாறு இருக்கும் என கூறுகிறது .,

1.நின்று கொண்டு பேசும் போது தலையை விரல்களால் சொறிந்தபடி நிற்பவர்கள் -- ஞாபக மறதிக் காரர்கள் .

2.விரல் நகத்தை கடித்து கொண்டே பேசுபவர்கள், எந்த காரியத்தையும் அதிக நேரம் எடுத்து கொண்டு செய்யும் ----- சுருசுருப்பில்லாதவர்கள்.

3. சட்டைப் பித்தானை திருகிக் கொண்டே பேசுபவர்கள் ,== தன்னம்பிக்கை இல்லாதவர்கள்.

4.பக்கத்தில் உள்ள டேபிள் மீதோ , சேர் மீதோ விரலால் தட்டிக் கொண்டே பேசுபவர்கள் ------ அலட்சிய மனோ பாவம் உள்ளவர்கள்.

5.விரலை மடக்கி உள்ளங்கையால் தேய்த்த படி பேசுபவர்கள் ,------ பயந்த சுபாவம் உள்ளவர்கள் ...

இப்படி போகிறது , அந்த ஆராய்ச்சி குறிப்பு, இது உங்களுக்கு ஏற்புடையதாக உள்ளதா ? உங்கள் கருத்தை தெரிவியுங்கள்.

கம்யூனிஸ்ட் பிரச்சாரத்தில் நமீதா ................

2009-05-06T21:53:00.000-07:00

நம்ம ஊர்ல ( அதாங்க மதுரை ) நேத்து , மீனாக்ஷி அம்மன் தேரோட்டம் நடந்ததால், இரவு வழக்கத்தை விட பெரிய டிராபிக் ஜாம் அதனால நெல்பேட்டை அருகே நடந்த கம்யூனிஸ்ட் பிரசார கூட்டத்தை கவனிக்கிற மாதிரி ஆகிடுச்சி. வில்லுபாட்டு ஸ்டைல் ல ரெண்டு பேரு பேசிகிட்டும் , பாடிக்கிட்டும் இருந்தாங்க. சரி தோழர்கள் மின்வெட்டு, இலங்கை பிரச்னை, அணு ஆயுத ஒப்பந்தம் இத பத்தி ஏதாவது சொல்லுவாங்க அப்டின்னு பார்த்தால், மானாட மயிலாட ,வில,நமிதா ன்னு ஒரு பொண்ணு வரும், அது டவுசர் போட்டு வரும் ,சேலை கட்ட தெரியாது,அப்டி இப்டின்னு இருவது நிமிஷம் பேசினாங்க . அதுக்குள்ளே டிராபிக் கொஞ்சம் கிளியர் ஆனதால நான் கிளம்பிட்டேன். ஒரு கதை ஒன்று என் நினைவிற்கு வந்தது.ஒரு துறவி தன் சீடர்களிடம் சொன்னாராம், துறவறத்தில் இருக்கும் நாம் எந்த பெண்களையும் தொடக் கூடாது என்று. ஒரு நாள் அந்த துறவியும் , சீடர்களும் ஒரு ஆற்றை கடந்து செல்ல நேர்ந்தது. திடீரென ஆற்றில் வெள்ளம் வந்து , அதில் ஒரு பெண் அடித்து செல்லப் பட்டு கொண்டிருந்தாள். உடனே அந்த துறவி சற்றும் தாமதிக்காமல் ஆற்றில் நீந்தி சென்று அந்த பெண்ணை காப்பாற்றி கரை சேர்த்து விட்டு சீடர்களுடன் பயணத்தை தொடர்ந்தார். ஒரு சீடன் மிகுந்த குழப்பத்துடனே வந்து கொண்டு இருந்தான் , கொஞ்ச நேரம் கழித்து துறவியிடம் கேட்டானாம்,பெண்களை தொட கூடாது என்று சொல்லி விட்டு ,நீங்கள் மட்டும் ஒரு பெண்ணை தொடலாமா ? இது தவறில்லையா? என்றானாம் . துறவி, நான் ஆற்றங்கரையிலேயே அந்த பெண்ணை இறக்கி விட்டேன். ஆனால் நீ இப்போது வரை அப்பெண்ணை உன் நினைவில் தூக்கி வந்து கொண்டிருக்கிறாய் என்று முடித்தார். இந்த கதைக்கும் , தோழர்கள் பிரச்சாரத்துக்கும் என்ன சம்மந்தம் என்கிறீர்களா ?. கலைஞர் டிவி ல, நமீதா வந்தது, போனது எப்போவோ முடிஞ்சு போன விஷயம் , ஆனா , இன்னமும் நமீதா வை மனசில தூக்கி கொண்டே செல்லும் நம் தோழர்கள் அந்த சீடனை போல . வாழ்க கம்யுனிசம், வளர்க நமீதா புகழ்.

வென்று விட்டார் மதுரை வீரர் , வந்து வாழ்த்துங்க

2009-05-05T22:29:00.000-07:00

இட்லி கடையிலிருந்து ஐ ஐ எம் போன சரத் மாதிரி, எங்க ஊரிலேயும் ஒரு வெற்றி வீரர் சாதிச்சிருக்கார். அவர் மதுரை அண்ணா நகரை சேர்ந்த திரு.வீரபாண்டியன் . படிக்கும் போது குடும்ப வறுமையின் காரணமாக பள்ளி விட்டு வந்த பின்பு தினமும் மாலை நாலு மணி முதல் இரவு பதினோரு மணி வரை புரோட்டா கடையில் வேலை பார்த்து கொண்டே படித்துள்ளார். மாநகராட்சி பள்ளியில் படித்து ,மாநில அளவில் புவியியல் பாடத்தில் முதலிடம் பெற்ற இவர் , லயோலா வில் பி ஏ முடித்திருக்கிறார். தற்போது ஐ.ஏ.எஸ். தேர்வில் தேசிய அளவில் ஐம்பத்து மூன்றாவது இடத்தை பிடித்துள்ளார். சிறு வயதில் கலெக்டர் காரில் செல்வதை பார்த்து நானும் ஒரு நாள் கலெக்டர் ஆவேன் என்று கனவு கண்டுள்ளார், இந்த கலாம் கண்ட மாணவர். இன்று கனவினை நனவாக்கி உள்ளார். தாம் படித்த பள்ளிகளுக்கும், பெற்றோர்களுக்கும் பெருமை தேடி தந்துள்ளார். இன்றைய மாணவர்களும் ,அவர்கள் பெற்றோர்களும் தெரிந்து கொள்ள வேண்டிய முக்கிய செய்தி ஒன்று இதில் உள்ளது . அதிகமாக பணம் கேட்கும் ஆங்கில வழி கல்வி முறை தான் சிறந்தது என்பது தவறு. மற்றும் வறுமை ஒருவனது லட்சியத்துக்கு தடை கல்லாக இருக்க முடியாது. வாழ்க வீரபாண்டியன் ஐ.ஏ .எஸ். , சிறக்கட்டும் அவரது பணி.....,

அம்மா ஆட்சி பொறுப்பை ஏற்றார்.

2009-05-04T21:44:00.002-07:00

மதுரை யில் கடந்த பத்து நாட்களாக நடந்து வரும் மீனாட்சி அம்மன் கோயில் திருவிழாவில் , கடந்த ஞாயிறு அன்று அன்னை மீனாக்ஷியின் பட்டாபிசேகம் இனிதே நடந்தேறியது. அம்மா ஆட்சி பொறுப்பை ஏற்று கொண்டார்.

இதன் தொடர்ச்சியாக நேற்று திக் விஜயம், இன்று திருக்கல்யாணம், நாளை தேரோட்டம் நடைபெறும். அனைவரும் வந்து அம்மாவின் அருளாசி பெருக.

இரண்டாம் தேதியில் இரண்டாவது பதிவு

2009-05-02T04:34:00.000-07:00

முதல் பதிவுக்கு ஆதரவளித்து , நேரிலும், தொலைபேசி வாயிலாகவும், பின்னூட்டம் வழியாகவும் ஊக்கப் படுத்திய கோடானு கோடி தமிழ் நெஞ்சங்களுக்கு நன்றி. அக்கறையுடன் எழுதிய சக்கரை க்கும் நன்றி.
முதல் பதிவு முடித்தவுடன் தொலைபேசியில் நள்ளிரவில் ஒரு அழைப்பு வந்தது. ஆங்கிலத்தில் பேசியதால் அரைகுறை யாகவே கேட்டது . ஒபாமா விடம் இருந்து என்பது புரிந்தது. அப்போது அவர் என்னிடம் கேட்டு கொண்டது ,
தொண்டர் இல்லாமல் கட்சி ஆரம்பிக்கிறது,
கதை இல்லாம சினிமா எடுக்கிறது,
சரக்கு இல்லாம பதிவு போடுறது ,
இது மூன்றையும் உடனே நிறுத்த சொன்னார்.
\கடைசியா ஒன்னு சொன்னாரு, இத மீறி எதாவது நடந்துச்சுன்னா நான் ஒபாமா வா இருக்க மாட்டேன் , ஒசாமா வா மாறிடுவேன் அப்டின்னு புதியகீதை விஜய் சொல்ற மாதிரி சொன்னாரு.
சரி எதுக்கு வம்பு ன்னுதான் இதுவரைக்கும் பதிவு போடல.
இனிமே அடிக்கடி பதிய போறேன். எல்லா புகழும் சக்கரைக்கே.

முதல் பதிவு

2009-04-17T05:00:00.000-07:00

தமிழ் உலக அனைத்து முன்னோடிகளுக்கும் என் பணிவான , முதல் வணக்கம். PKP,

தமிழ் நெஞ்சம், kricons, மற்றும் சக்கரை க்கு வணக்கம். மதுரையின் மூத்த பதிவர் பேராசிரியர். தருமி., அவர்களுக்கும் வணக்கம்.